اهي شغلتنا كده يافندية نفضل نحزق بالصفة ديه

نهاتي واللي نقوله نعيده كاننا بنقرا فى عدية

دا الجرسون منا يا بيه وحياتك له الجنة

يامابنقاسي فى خوته ودوشة ومرمطة ياخوانا

نفضل شايلين صواني وماشيين زي المكوك رايحين جايين

يبقى دا يصقف ودا يهاتي ودا يخبط كده بوريه

ياخواتي خلو عقلنا سبعة سباتي ح يلحسوه

اهو المقدر يانى عليه يفرح يكدر مش بايديه

بلا مارتيل بلا ويسكي وصودا دا الجرسون عايش عيشة سوده

كان مالنا احنا ومال الكار دا …… ولسه ياما ح نشوف ياسي فوده

بالله احسب يابيه كام كيلو بنمشي فى الساعة

بس من البوفيه للزبون .. كده من غير لكاعة

دا عنده دورين ودا ثلاثة دا عايز فرموت ودا جيلاتة

داعايز دور ويسكي ودا بيرة ودا مزة ودا كافيه

أحيه لاهو الجرسون عقله دفتر توب عليه

زباينا مالها جرى لها ايه بقشيش مافيش ياخوانا ليه

دا التشطيب دا ومنع الخمرة خلو عيشيتنا جهنم حمرة

كان ييجي الزبون لنا طينة نغالطه ونجرده ياابو سمرة

اللى عنده عيال يابيه يعيش إزاي الايام دي

وياريت ع الشقا اللى احنا فيه بتزيد ياسي حمدي

ياناس دا حرام دا احنا غلابة آدى احنا عملنا لنا نقابة

طول ما احنا ياصاحبي ايد واحدة

موش ممكن ننضام …… برضة مسيرنا نبلغ أمانينا بالوئام